॥ नमो तस्स भगवतो अरहतो सम्मासम्बुद्धस्स॥
अभिधम्मपिटके
धम्मसङ्गणीपाळि
मातिका
१. तिकमातिका
१. (क) कुसला धम्मा।
(ख) अकुसला धम्मा।
(ग) अब्याकता धम्मा।
२. (क) सुखाय वेदनाय सम्पयुत्ता धम्मा।
(ख) दुक्खाय वेदनाय सम्पयुत्ता धम्मा।
(ग) अदुक्खमसुखाय वेदनाय सम्पयुत्ता धम्मा।
३. (क) विपाका धम्मा।
(ख) विपाकधम्मधम्मा।
(ग) नेवविपाकनविपाकधम्मधम्मा।
४. (क) उपादिण्णुपादानिया [उपादिन्नुपादानिया (स्या॰)] धम्मा।
(ख) अनुपादिण्णुपादानिया धम्मा।
(ग) अनुपादिण्णअनुपादानिया [अनुपादिन्नानुपादानिया (स्या॰)] धम्मा।
५. (क) संकिलिट्ठसंकिलेसिका धम्मा।
(ख) असंकिलिट्ठसंकिलेसिका धम्मा।
(ग) असंकिलिट्ठअसंकिलेसिका [असंकिलिट्ठासंकिलेसिका (स्या॰)] धम्मा।
६. (क) सवितक्कसविचारा धम्मा।
(ख) अवितक्कविचारमत्ता धम्मा।
(ग) अवितक्कअविचारा [अवितक्काविचारा (स्या॰)] धम्मा।
७. (क) पीतिसहगता धम्मा।
(ख) सुखसहगता धम्मा।
(ग) उपेक्खासहगता धम्मा।
८. (क) दस्सनेन पहातब्बा धम्मा।
(ख) भावनाय पहातब्बा धम्मा।
(ग) नेव दस्सनेन न भावनाय पहातब्बा धम्मा।
९. (क) दस्सनेन पहातब्बहेतुका धम्मा।
(ख) भावनाय पहातब्बहेतुका धम्मा।
(ग) नेव दस्सनेन न भावनाय पहातब्बहेतुका धम्मा।
१०. (क) आचयगामिनो धम्मा।
(ख) अपचयगामिनो धम्मा।
(ग) नेवाचयगामिनापचयगामिनो [नेवाचयगामिनो नापचयगामिनो (स्या॰)] धम्मा।
११. (क) सेक्खा धम्मा।
(ख) असेक्खा धम्मा।
(ग) नेवसेक्खनासेक्खा [नेवसेक्खानासेक्खा (सी॰ स्या॰)] धम्मा।
१२. (क) परित्ता धम्मा।
(ख) महग्गता धम्मा।
(ग) अप्पमाणा धम्मा।
१३. (क) परित्तारम्मणा धम्मा।
(ख) महग्गतारम्मणा धम्मा।
(ग) अप्पमाणारम्मणा धम्मा।
१४. (क) हीना धम्मा।
(ख) मज्झिमा धम्मा।
(ग) पणीता धम्मा।
१५. (क) मिच्छत्तनियता धम्मा।
(ख) सम्मत्तनियता धम्मा।
(ग) अनियता धम्मा।
१६. (क) मग्गारम्मणा धम्मा।
(ख) मग्गहेतुका धम्मा।
(ग) मग्गाधिपतिनो धम्मा।
१७. (क) उप्पन्ना धम्मा।
(ख) अनुप्पन्ना धम्मा।
(ग) उप्पादिनो धम्मा।
१८. (क) अतीता धम्मा।
(ख) अनागता धम्मा।
(ग) पच्चुप्पन्ना धम्मा।
१९. (क) अतीतारम्मणा धम्मा।
(ख) अनागतारम्मणा धम्मा।
(ग) पच्चुप्पन्नारम्मणा धम्मा।
२०. (क) अज्झत्ता धम्मा।
(ख) बहिद्धा धम्मा।
(ग) अज्झत्तबहिद्धा धम्मा।
२१. (क) अज्झत्तारम्मणा धम्मा।
(ख) बहिद्धारम्मणा धम्मा।
(ग) अज्झत्तबहिद्धारम्मणा धम्मा।
२२. (क) सनिदस्सनसप्पटिघा धम्मा।
(ख) अनिदस्सनसप्पटिघा धम्मा।
(ग) अनिदस्सनअप्पटिघा [अनिदस्सनाप्पटिघा (स्या॰)] धम्मा।
तिकमातिका।
२. दुकमातिका
हेतुगोच्छकं
१. (क) हेतू धम्मा।
(ख) न हेतू धम्मा।
२. (क) सहेतुका धम्मा।
(ख) अहेतुका धम्मा।
३. (क) हेतुसम्पयुत्ता धम्मा।
(ख) हेतुविप्पयुत्ता धम्मा।
४. (क) हेतू चेव धम्मा सहेतुका च।
(ख) सहेतुका चेव धम्मा न च हेतू।
५. (क) हेतू चेव धम्मा हेतुसम्पयुत्ता च।
(ख) हेतुसम्पयुत्ता चेव धम्मा न च हेतू।
६. (क) न हेतू खो पन धम्मा सहेतुकापि।
(ख) अहेतुकापि।
हेतुगोच्छकं।
चूळन्तरदुकं
७. (क) सप्पच्चया धम्मा।
(ख) अप्पच्चया धम्मा।
८. (क) सङ्खता धम्मा।
(ख) असङ्खता धम्मा।
९. (क) सनिदस्सना धम्मा।
(ख) अनिदस्सना धम्मा।
१०. (क) सप्पटिघा धम्मा।
(ख) अप्पटिघा धम्मा।
११. (क) रूपिनो धम्मा।
(ख) अरूपिनो धम्मा।
१२. (क) लोकिया धम्मा ।
(ख) लोकुत्तरा धम्मा।
१३. (क) केनचि विञ्ञेय्या धम्मा।
(ख) केनचि न विञ्ञेय्या धम्मा।
चूळन्तरदुकं।
आसवगोच्छकं
१४. (क) आसवा धम्मा।
(ख) नो आसवा धम्मा।
१५. (क) सासवा धम्मा।
(ख) अनासवा धम्मा।
१६. (क) आसवसम्पयुत्ता धम्मा।
(ख) आसवविप्पयुत्ता धम्मा।
१७. (क) आसवा चेव धम्मा सासवा च।
(ख) सासवा चेव धम्मा नो च आसवा।
१८. (क) आसवा चेव धम्मा आसवसम्पयुत्ता च।
(ख) आसवसम्पयुत्ता चेव धम्मा नो च आसवा।
१९. (क) आसवविप्पयुत्ता खो पन धम्मा सासवापि।
(ख) अनासवापि।
आसवगोच्छकं।
संयोजनगोच्छकं
२०. (क) संयोजना धम्मा।
(ख) नो संयोजना धम्मा।
२१. (क) संयोजनिया धम्मा।
(ख) असंयोजनिया धम्मा।
२२. (क) संयोजनसम्पयुत्ता धम्मा।
(ख) संयोजनविप्पयुत्ता धम्मा।
२३. (क) संयोजना चेव धम्मा संयोजनिया च।
(ख) संयोजनिया चेव धम्मा नो च संयोजना।
२४. (क) संयोजना चेव धम्मा संयोजनसम्पयुत्ता च।
(ख) संयोजनसम्पयुत्ता चेव धम्मा नो च संयोजना।
२५. (क) संयोजनविप्पयुत्ता खो पन धम्मा संयोजनियापि।
(ख) असंयोजनियापि।
संयोजनगोच्छकं।
गन्थगोच्छकं
२६. (क) गन्था धम्मा।
(ख) नो गन्था धम्मा।
२७. (क) गन्थनिया धम्मा।
(ख) अगन्थनिया धम्मा।
२८. (क) गन्थसम्पयुत्ता धम्मा।
(ख) गन्थविप्पयुत्ता धम्मा।
२९. (क) गन्था चेव धम्मा गन्थनिया च।
(ख) गन्थनिया चेव धम्मा नो च गन्था।
३०. (क) गन्था चेव धम्मा गन्थसम्पयुत्ता च।
(ख) गन्थसम्पयुत्ता चेव धम्मा नो च गन्था।
३१. (क) गन्थविप्पयुत्ता खो पन धम्मा गन्थनियापि।
(ख) अगन्थनियापि।
गन्थगोच्छकं।
ओघगोच्छकं
३२. (क) ओघा धम्मा।
(ख) नो ओघा धम्मा।
३३. (क) ओघनिया धम्मा।
(ख) अनोघनिया धम्मा।
३४. (क) ओघसम्पयुत्ता धम्मा।
(ख) ओघविप्पयुत्ता धम्मा।
३५. (क) ओघा चेव धम्मा ओघनिया च।
(ख) ओघनिया चेव धम्मा नो च ओघा।
३६. (क) ओघा चेव धम्मा ओघसम्पयुत्ता च।
(ख) ओघसम्पयुत्ता चेव धम्मा नो च ओघा।
३७. (क) ओघविप्पयुत्ता खो पन धम्मा ओघनियापि।
(ख) अनोघनियापि।
ओघगोच्छकं।
योगगोच्छकं
३८. (क) योगा धम्मा।
(ख) नो योगा धम्मा।
३९. (क) योगनिया धम्मा।
(ख) अयोगनिया धम्मा।
४०. (क) योगसम्पयुत्ता धम्मा।
(ख) योगविप्पयुत्ता धम्मा।
४१. (क) योगा चेव धम्मा योगनिया च।
(ख) योगनिया चेव धम्मा नो च योगा।
४२. (क) योगा चेव धम्मा योगसम्पयुत्ता च।
(ख) योगसम्पयुत्ता चेव धम्मा नो च योगा।
४३. (क) योगविप्पयुत्ता खो पन धम्मा योगनियापि।
(ख) अयोगनियापि।
योगगोच्छकं।
नीवरणगोच्छकं
४४. (क) नीवरणा धम्मा।
(ख) नो नीवरणा धम्मा।
४५. (क) नीवरणिया धम्मा।
(ख) अनीवरणिया धम्मा।
४६. (क) नीवरणसम्पयुत्ता धम्मा।
(ख) नीवरणविप्पयुत्ता धम्मा।
४७. (क) नीवरणा चेव धम्मा नीवरणिया च।
(ख) नीवरणिया चेव धम्मा नो च नीवरणा।
४८. (क) नीवरणा चेव धम्मा नीवरणसम्पयुत्ता च।
(ख) नीवरणसम्पयुत्ता चेव धम्मा नो च नीवरणा।
४९. (क) नीवरणविप्पयुत्ता खो पन धम्मा नीवरणियापि।
(ख) अनीवरणियापि ।
नीवरणगोच्छकं।
परामासगोच्छकं
५०. (क) परामासा धम्मा।
(ख) नो परामासा धम्मा।
५१. (क) परामट्ठा धम्मा।
(ख) अपरामट्ठा धम्मा।
५२. (क) परामाससम्पयुत्ता धम्मा।
(ख) परामासविप्पयुत्ता धम्मा।
५३. (क) परामासा चेव धम्मा परामट्ठा च।
(ख) परामट्ठा चेव धम्मा नो च परामासा।
५४. (क) परामासविप्पयुत्ता खो पन धम्मा परामट्ठापि।
(ख) अपरामट्ठापि।
परामासगोच्छकं।
महन्तरदुकं
५५. (क) सारम्मणा धम्मा।
(ख) अनारम्मणा धम्मा।
५६. (क) चित्ता धम्मा।
(ख) नो चित्ता धम्मा।
५७. (क) चेतसिका धम्मा।
(ख) अचेतसिका धम्मा।
५८. (क) चित्तसम्पयुत्ता धम्मा।
(ख) चित्तविप्पयुत्ता धम्मा।
५९. (क) चित्तसंसट्ठा धम्मा।
(ख) चित्तविसंसट्ठा धम्मा।
६०. (क) चित्तसमुट्ठाना धम्मा।
(ख) नो चित्तसमुट्ठाना धम्मा।
६१. (क) चित्तसहभुनो धम्मा।
(ख) नो चित्तसहभुनो धम्मा।
६२. (क) चित्तानुपरिवत्तिनो धम्मा।
(ख) नो चित्तानुपरिवत्तिनो धम्मा।
६३. (क) चित्तसंसट्ठसमुट्ठाना धम्मा।
(ख) नो चित्तसंसट्ठसमुट्ठाना धम्मा।
६४. (क) चित्तसंसट्ठसमुट्ठानसहभुनो धम्मा।
(ख) नो चित्तसंसट्ठसमुट्ठानसहभुनो धम्मा।
६५. (क) चित्तसंसट्ठसमुट्ठानानुपरिवत्तिनो धम्मा।
(ख) नो चित्तसंसट्ठसमुट्ठानानुपरिवत्तिनो धम्मा।
६६. (क) अज्झत्तिका धम्मा।
(ख) बाहिरा धम्मा।
६७. (क) उपादा धम्मा।
(ख) नो उपादा धम्मा।
६८. (क) उपादिण्णा [उपादिन्ना (सी॰ स्या॰)] धम्मा।
(ख) अनुपादिण्णा धम्मा।
महन्तरदुकं।
उपादानगोच्छकं
६९. (क) उपादाना धम्मा।
(ख) नो उपादाना धम्मा।
७०. (क) उपादानिया धम्मा।
(ख) अनुपादानिया धम्मा।
७१. (क) उपादानसम्पयुत्ता धम्मा।
(ख) उपादानविप्पयुत्ता धम्मा।
७२. (क) उपादाना चेव धम्मा उपादानिया च।
(ख) उपादानिया चेव धम्मा नो च उपादाना।
७३. (क) उपादाना चेव धम्मा उपादानसम्पयुत्ता च।
(ख) उपादानसम्पयुत्ता चेव धम्मा नो च उपादाना।
७४. (क) उपादानविप्पयुत्ता खो पन धम्मा उपादानियापि।
(ख) अनुपादानियापि।
उपादानगोच्छकं।
किलेसगोच्छकं
७५. (क) किलेसा धम्मा।
(ख) नो किलेसा धम्मा।
७६. (क) संकिलेसिका धम्मा।
(ख) असंकिलेसिका धम्मा।
७७. (क) संकिलिट्ठा धम्मा।
(ख) असंकिलिट्ठा धम्मा।
७८. (क) किलेससम्पयुत्ता धम्मा।
(ख) किलेसविप्पयुत्ता धम्मा।
७९. (क) किलेसा चेव धम्मा संकिलेसिका च।
(ख) संकिलेसिका चेव धम्मा नो च किलेसा।
८०. (क) किलेसा चेव धम्मा संकिलिट्ठा च।
(ख) संकिलिट्ठा चेव धम्मा नो च किलेसा।
८१. (क) किलेसा चेव धम्मा किलेससम्पयुत्ता च।
(ख) किलेससम्पयुत्ता चेव धम्मा नो च किलेसा।
८२. (क) किलेसविप्पयुत्ता खो पन धम्मा संकिलेसिकापि।
(ख) असंकिलेसिकापि।
किलेसगोच्छकं।
पिट्ठिदुकं
८३. (क) दस्सनेन पहातब्बा धम्मा।
(ख) न दस्सनेन पहातब्बा धम्मा।
८४. (क) भावनाय पहातब्बा धम्मा।
(ख) न भावनाय पहातब्बा धम्मा।
८५. (क) दस्सनेन पहातब्बहेतुका धम्मा।
(ख) न दस्सनेन पहातब्बहेतुका धम्मा।
८६. (क) भावनाय पहातब्बहेतुका धम्मा।
(ख) न भावनाय पहातब्बहेतुका धम्मा।
८७. (क) सवितक्का धम्मा।
(ख) अवितक्का धम्मा।
८८. (क) सविचारा धम्मा।
(ख) अविचारा धम्मा।
८९. (क) सप्पीतिका धम्मा।
(ख) अप्पीतिका धम्मा।
९०. (क) पीतिसहगता धम्मा।
(ख) न पीतिसहगता धम्मा।
९१. (क) सुखसहगता धम्मा।
(ख) न सुखसहगता धम्मा।
९२. (क) उपेक्खासहगता धम्मा।
(ख) न उपेक्खासहगता धम्मा।
९३. (क) कामावचरा धम्मा।
(ख) न कामावचरा धम्मा।
९४. (क) रूपावचरा धम्मा।
(ख) न रूपावचरा धम्मा।
९५. (क) अरूपावचरा धम्मा।
(ख) न अरूपावचरा धम्मा।
९६. (क) परियापन्ना धम्मा।
(ख) अपरियापन्ना धम्मा।
९७. (क) निय्यानिका धम्मा।
(ख) अनिय्यानिका धम्मा।
९८. (क) नियता धम्मा।
(ख) अनियता धम्मा।
९९. (क) सउत्तरा धम्मा।
(ख) अनुत्तरा धम्मा।
१००. (क) सरणा धम्मा।
(ख) अरणा धम्मा।
पिट्ठिदुकं।
अभिधम्मदुकमातिका।
सुत्तन्तिकदुकमातिका
१०१. (क) विज्जाभागिनो धम्मा।
(ख) अविज्जाभागिनो धम्मा।
१०२. (क) विज्जूपमा धम्मा।
(ख) वजिरूपमा धम्मा।
१०३. (क) बाला धम्मा।
(ख) पण्डिता धम्मा।
१०४. (क) कण्हा धम्मा।
(ख) सुक्का धम्मा।
१०५. (क) तपनीया धम्मा।
(ख) अतपनीया धम्मा।
१०६. (क) अधिवचना धम्मा।
(ख) अधिवचनपथा धम्मा।
१०७. (क) निरुत्ति धम्मा।
(ख) निरुत्तिपथा धम्मा।
१०८. (क) पञ्ञत्ति धम्मा।
(ख) पञ्ञत्तिपथा धम्मा।
१०९. (क) नामञ्च।
(ख) रूपञ्च।
११०. (क) अविज्जा च।
(ख) भवतण्हा च।
१११. (क) भवदिट्ठि च।
(ख) विभवदिट्ठि च।
११२. (क) सस्सतदिट्ठि च।
(ख) उच्छेददिट्ठि च।
११३. (क) अन्तवा दिट्ठि च।
(ख) अनन्तवा दिट्ठि च।
११४. (क) पुब्बन्तानुदिट्ठि च।
(ख) अपरन्तानुदिट्ठि च।
११५. (क) अहिरिकञ्च।
(ख) अनोत्तप्पञ्च।
११६. (क) हिरी च।
(ख) ओत्तप्पञ्च।
११७. (क) दोवचस्सता च।
(ख) पापमित्तता च।
११८. (क) सोवचस्सता च।
(ख) कल्याणमित्तता च।
११९. (क) आपत्तिकुसलता च।
(ख) आपत्तिवुट्ठानकुसलता च।
१२०. (क) समापत्तिकुसलता च।
(ख) समापत्तिवुट्ठानकुसलता च।
१२१. (क) धातुकुसलता च।
(ख) मनसिकारकुसलता च।
१२२. (क) आयतनकुसलता च।
(ख) पटिच्चसमुप्पादकुसलता च।
१२३. (क) ठानकुसलता च।
(ख) अट्ठानकुसलता च।
१२४. (क) अज्जवो च।
(ख) मद्दवो च।
१२५. (क) खन्ति च।
(ख) सोरच्चञ्च।
१२६. (क) साखल्यञ्च।
(ख) पटिसन्थारो च [पटिसन्धारो च (क॰)]।
१२७. (क) इन्द्रियेसु अगुत्तद्वारता च।
(ख) भोजने अमत्तञ्ञुता च।
१२८. (क) इन्द्रियेसु गुत्तद्वारता च।
(ख) भोजने मत्तञ्ञुता च।
१२९. (क) मुट्ठसच्चञ्च।
(ख) असम्पजञ्ञञ्च।
१३०. (क) सति च।
(ख) सम्पजञ्ञञ्च।
१३१. (क) पटिसङ्खानबलञ्च।
(ख) भावनाबलञ्च।
१३२. (क) समथो च।
(ख) विपस्सना च।
१३३. (क) समथनिमित्तञ्च ।
(ख) पग्गाहनिमित्तञ्च।
१३४. (क) पग्गाहो च।
(ख) अविक्खेपो च।
१३५. (क) सीलविपत्ति च।
(ख) दिट्ठिविपत्ति च।
१३६. (क) सीलसम्पदा च।
(ख) दिट्ठिसम्पदा च।
१३७. (क) सीलविसुद्धि च।
(ख) दिट्ठिविसुद्धि च।
१३८. (क) दिट्ठिविसुद्धि खो पन।
(ख) यथादिट्ठिस्स च पधानं।
१३९. (क) संवेगो च संवेजनियेसु ठानेसु।
(ख) संविग्गस्स च योनिसो पधानं।
१४०. (क) असन्तुट्ठिता च कुसलेसु धम्मेसु।
(ख) अप्पटिवानिता च पधानस्मिं।
१४१. (क) विज्जा च।
(ख) विमुत्ति च।
१४२. (क) खये ञाणं।
(ख) अनुप्पादे ञाणन्ति।
सुत्तन्तिकदुकमातिका [सुत्तन्तमातिका (स्या॰)]।
मातिका निट्ठिता।