Tipitaka >> Abhidhamma Pitaka >> Dhatukatha >> Pali-Devanagri version-Chapter 1
Dhatukatha Chapter 1[]
१. पठमनयो
१. सङ्गहासङ्गहपदनिद्देसो
१. खन्धो
६. रूपक्खन्धो कतिहि खन्धेहि कतिहायतनेहि कतिहि धातूहि सङ्गहितो? रूपक्खन्धो एकेन खन्धेन एकादसहायतनेहि एकादसहि धातूहि सङ्गहितो। कतिहि असङ्गहितो? चतूहि खन्धेहि एकेनायतनेन सत्तहि धातूहि असङ्गहितो।
७. वेदनाक्खन्धो कतिहि खन्धेहि कतिहायतनेहि कतिहि धातूहि सङ्गहितो? वेदनाक्खन्धो एकेन खन्धेन एकेनायतनेन एकाय धातुया सङ्गहितो। कतिहि असङ्गहितो? चतूहि खन्धेहि एकादसहायतनेहि सत्तरसहि धातूहि असङ्गहितो।
८. सञ्ञाक्खन्धो कतिहि खन्धेहि कतिहायतनेहि कतिहि धातूहि सङ्गहितो? सञ्ञाक्खन्धो एकेन खन्धेन एकेनायतनेन एकाय धातुया सङ्गहितो। कतिहि असङ्गहितो? चतूहि खन्धेहि एकादसहायतनेहि सत्तरसहि धातूहि असङ्गहितो।
९. सङ्खारक्खन्धो कतिहि खन्धेहि कतिहायतनेहि कतिहि धातूहि सङ्गहितो? सङ्खारक्खन्धो एकेन खन्धेन एकेनायतनेन एकाय धातुया सङ्गहितो। कतिहि असङ्गहितो? चतूहि खन्धेहि एकादसहायतनेहि सत्तरसहि धातूहि असङ्गहितो।
१०. विञ्ञाणक्खन्धो कतिहि खन्धेहि कतिहायतनेहि कतिहि धातूहि सङ्गहितो? विञ्ञाणक्खन्धो एकेन खन्धेन एकेनायतनेन सत्तहि धातूहि सङ्गहितो। कतिहि असङ्गहितो? चतूहि खन्धेहि एकादसहायतनेहि एकादसहि धातूहि असङ्गहितो।
(एकमूलकं।)
११. रूपक्खन्धो च वेदनाक्खन्धो च कतिहि खन्धेहि कतिहायतनेहि कतिहि धातूहि सङ्गहिता? रूपक्खन्धो च वेदनाक्खन्धो च द्वीहि खन्धेहि एकादसहायतनेहि एकादसहि धातूहि सङ्गहिता। कतिहि असङ्गहिता? तीहि खन्धेहि एकेनायतनेन सत्तहि धातूहि असङ्गहिता।
१२. रूपक्खन्धो च सञ्ञाक्खन्धो च…पे॰… द्वीहि खन्धेहि एकादसहायतनेहि एकादसहि धातूहि सङ्गहिता। कतिहि असङ्गहिता? तीहि खन्धेहि एकेनायतनेन सत्तहि धातूहि असङ्गहिता।
१३. रूपक्खन्धो च सङ्खारक्खन्धो च…पे॰… द्वीहि खन्धेहि एकादसहायतनेहि एकादसहि धातूहि सङ्गहिता। कतिहि असङ्गहिता? तीहि खन्धेहि एकेनायतनेन सत्तहि धातूहि असङ्गहिता।
१४. रूपक्खन्धो च विञ्ञाणक्खन्धो च…पे॰… द्वीहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? तीहि खन्धेहि, न केहिचि आयतनेहि न काहिचि धातूहि असङ्गहिता।
(दुकमूलकं।)
१५. रूपक्खन्धो च वेदनाक्खन्धो च सञ्ञाक्खन्धो च कतिहि खन्धेहि कतिहायतनेहि कतिहि धातूहि सङ्गहिता? रूपक्खन्धो च वेदनाक्खन्धो च सञ्ञाक्खन्धो च तीहि खन्धेहि एकादसहायतनेहि एकादसहि धातूहि सङ्गहिता। कतिहि असङ्गहिता? द्वीहि खन्धेहि एकेनायतनेन सत्तहि धातूहि असङ्गहिता।
१६. रूपक्खन्धो च वेदनाक्खन्धो च सङ्खारक्खन्धो च…पे॰… तीहि खन्धेहि एकादसहायतनेहि एकादसहि धातूहि सङ्गहिता। कतिहि असङ्गहिता? द्वीहि खन्धेहि एकेनायतनेन सत्तहि धातूहि असङ्गहिता।
१७. रूपक्खन्धो च वेदनाक्खन्धो च विञ्ञाणक्खन्धो च…पे॰… तीहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? द्वीहि खन्धेहि, न केहिचि आयतनेहि न काहिचि धातूहि असङ्गहिता।
(तिकमूलकं।)
१८. रूपक्खन्धो च वेदनाक्खन्धो च सञ्ञाक्खन्धो च सङ्खारक्खन्धो च कतिहि खन्धेहि कतिहायतनेहि कतिहि धातूहि सङ्गहिता? रूपक्खन्धो च वेदनाक्खन्धो च सञ्ञाक्खन्धो च सङ्खारक्खन्धो च चतूहि खन्धेहि एकादसहायतनेहि एकादसहि धातूहि सङ्गहिता। कतिहि असङ्गहिता? एकेन खन्धेन एकेनायतनेन सत्तहि धातूहि असङ्गहिता।
१९. रूपक्खन्धो च वेदनाक्खन्धो च सञ्ञाक्खन्धो च विञ्ञाणक्खन्धो च…पे॰… चतूहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? एकेन खन्धेन, न केहिचि आयतनेहि न काहिचि धातूहि असङ्गहिता।
(चतुक्कमूलकं।)
२०. रूपक्खन्धो च वेदनाक्खन्धो च सञ्ञाक्खन्धो च सङ्खारक्खन्धो च विञ्ञाणक्खन्धो च कतिहि खन्धेहि कतिहायतनेहि कतिहि धातूहि सङ्गहिता? रूपक्खन्धो च वेदनाक्खन्धो च सञ्ञाक्खन्धो च सङ्खारक्खन्धो च विञ्ञाणक्खन्धो च पञ्चहि खन्धेहि द्वादसायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
२१. पञ्चक्खन्धा कतिहि खन्धेहि कतिहायतनेहि कतिहि धातूहि सङ्गहिता? पञ्चक्खन्धा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
(पञ्चकं।)
२. आयतनं
२२. चक्खायतनं कतिहि खन्धेहि कतिहायतनेहि कतिहि धातूहि सङ्गहितं? चक्खायतनं एकेन खन्धेन एकेनायतनेन एकाय धातुया सङ्गहितं। कतिहि असङ्गहितं? चतूहि खन्धेहि एकादसहायतनेहि सत्तरसहि धातूहि असङ्गहितं।
२३. सोतायतनं … घानायतनं… जिव्हायतनं… कायायतनं… रूपायतनं… सद्दायतनं… गन्धायतनं… रसायतनं… फोट्ठब्बायतनं…पे॰… एकेन खन्धेन एकेनायतनेन एकाय धातुया सङ्गहितं। कतिहि असङ्गहितं? चतूहि खन्धेहि एकादसहायतनेहि सत्तरसहि धातूहि असङ्गहितं।
२४. मनायतनं एकेन खन्धेन एकेनायतनेन सत्तहि धातूहि सङ्गहितं। कतिहि असङ्गहितं? चतूहि खन्धेहि एकादसहायतनेहि एकादसहि धातूहि असङ्गहितं।
२५. धम्मायतनं असङ्खतं खन्धतो ठपेत्वा चतूहि खन्धेहि एकेनायतनेन एकाय धातुया सङ्गहितं। कतिहि असङ्गहितं? एकेन खन्धेन एकादसहायतनेहि सत्तरसहि धातूहि असङ्गहितं।
(एकमूलकं।)
२६. चक्खायतनञ्च सोतायतनञ्च एकेन खन्धेन द्वीहायतनेहि द्वीहि धातूहि सङ्गहिता। कतिहि असङ्गहिता? चतूहि खन्धेहि दसहायतनेहि सोळसहि धातूहि असङ्गहिता।
२७. चक्खायतनञ्च घानायतनञ्च… चक्खायतनञ्च जिव्हायतनञ्च… चक्खायतनञ्च कायायतनञ्च… चक्खायतनञ्च रूपायतनञ्च… चक्खायतनञ्च सद्दायतनञ्च… चक्खायतनञ्च गन्धायतनञ्च… चक्खायतनञ्च रसायतनञ्च… चक्खायतनञ्च फोट्ठब्बायतनञ्च एकेन खन्धेन द्वीहायतनेहि द्वीहि धातूहि सङ्गहिता। कतिहि असङ्गहिता? चतूहि खन्धेहि दसहायतनेहि सोळसहि धातूहि असङ्गहिता।
२८. चक्खायतनञ्च मनायतनञ्च द्वीहि खन्धेहि द्वीहायतनेहि अट्ठहि धातूहि सङ्गहिता। कतिहि असङ्गहिता? तीहि खन्धेहि दसहायतनेहि दसहि धातूहि असङ्गहिता।
२९. चक्खायतनञ्च धम्मायतनञ्च असङ्खतं खन्धतो ठपेत्वा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
(दुकमूलकं।)
३०. द्वादसायतनानि कतिहि खन्धेहि कतिहायतनेहि कतिहि धातूहि सङ्गहिता? द्वादसायतनानि असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
(द्वादसकं।)
३. धातु
३१. चक्खुधातु कतिहि खन्धेहि कतिहायतनेहि कतिहि धातूहि सङ्गहिता? चक्खुधातु एकेन खन्धेन एकेनायतनेन एकाय धातुया सङ्गहिता। कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
३२. सोतधातु… घानधातु… जिव्हाधातु… कायधातु… रूपधातु… सद्दधातु… गन्धधातु… रसधातु… फोट्ठब्बधातु… चक्खुविञ्ञाणधातु… सोतविञ्ञाणधातु… घानविञ्ञाणधातु… जिव्हाविञ्ञाणधातु… कायविञ्ञाणधातु… मनोधातु… मनोविञ्ञाणधातु एकेन खन्धेन एकेनायतनेन एकाय धातुया सङ्गहिता। कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
३३. धम्मधातु असङ्खतं खन्धतो ठपेत्वा चतूहि खन्धेहि एकेनायतनेन एकाय धातुया सङ्गहिता। कतिहि असङ्गहिता? एकेन खन्धेन एकादसहायतनेहि सत्तरसहि धातूहि असङ्गहिता।
(एकमूलकं।)
३४. चक्खुधातु च सोतधातु च एकेन खन्धेन द्वीहायतनेहि द्वीहि धातूहि सङ्गहिता। कतिहि असङ्गहिता? चतूहि खन्धेहि दसहायतनेहि सोळसहि धातूहि असङ्गहिता।
३५. चक्खुधातु च घानधातु च… चक्खुधातु च जिव्हाधातु च… चक्खुधातु च कायधातु च… चक्खुधातु च रूपधातु च… चक्खुधातु च सद्दधातु च… चक्खुधातु च गन्धधातु च… चक्खुधातु च रसधातु च… चक्खुधातु च फोट्ठब्बधातु च एकेन खन्धेन द्वीहायतनेहि द्वीहि धातूहि सङ्गहिता। कतिहि असङ्गहिता? चतूहि खन्धेहि दसहायतनेहि सोळसहि धातूहि असङ्गहिता।
३६. चक्खुधातु च चक्खुविञ्ञाणधातु च द्वीहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? तीहि खन्धेहि दसहायतनेहि सोळसहि धातूहि असङ्गहिता।
३७. चक्खुधातु च सोतविञ्ञाणधातु च… चक्खुधातु च घानविञ्ञाणधातु च… चक्खुधातु च जिव्हाविञ्ञाणधातु च… चक्खुधातु च कायविञ्ञाणधातु च… चक्खुधातु च मनोधातु च… चक्खुधातु च मनोविञ्ञाणधातु च द्वीहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? तीहि खन्धेहि दसहायतनेहि सोळसहि धातूहि असङ्गहिता।
३८. चक्खुधातु च धम्मधातु च असङ्खतं खन्धतो ठपेत्वा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
(दुकमूलकं।)
३९. अट्ठारस धातुयो कतिहि खन्धेहि कतिहायतनेहि कतिहि धातूहि सङ्गहिता? अट्ठारस धातुयो असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
(अट्ठारसकं।)
४. सच्चं
४०. दुक्खसच्चं कतिहि खन्धेहि कतिहायतनेहि कतिहि धातूहि सङ्गहितं? दुक्खसच्चं पञ्चहि खन्धेहि द्वादसहायतनेहि अट्ठारसहि धातूहि सङ्गहितं। कतिहि असङ्गहितं? न केहिचि खन्धेहि न केहिचि आयतनेहि न काहिचि धातूहि असङ्गहितं।
४१. समुदयसच्चं … मग्गसच्चं एकेन खन्धेन एकेनायतनेन एकाय धातुया सङ्गहितं। कतिहि असङ्गहितं? चतूहि खन्धेहि एकादसहायतनेहि सत्तरसहि धातूहि असङ्गहितं।
४२. निरोधसच्चं न केहिचि खन्धेहि एकेनायतनेन एकाय धातुया सङ्गहितं। कतिहि असङ्गहितं? पञ्चहि खन्धेहि एकादसहायतनेहि सत्तरसहि धातूहि असङ्गहितं।
(एकमूलकं।)
४३. दुक्खसच्चञ्च समुदयसच्चञ्च पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
४४. दुक्खसच्चञ्च मग्गसच्चञ्च पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
४५. दुक्खसच्चञ्च निरोधसच्चञ्च असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
(दुकमूलकं।)
४६. दुक्खसच्चञ्च समुदयसच्चञ्च मग्गसच्चञ्च पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
४७. दुक्खसच्चञ्च समुदयसच्चञ्च निरोधसच्चञ्च असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
(तिकमूलकं।)
४८. दुक्खसच्चञ्च समुदयसच्चञ्च मग्गसच्चञ्च निरोधसच्चञ्च असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
४९. चत्तारि सच्चानि कतिहि खन्धेहि कतिहायतनेहि कतिहि धातूहि सङ्गहितानि? चत्तारि सच्चानि असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहितानि। कतिहि असङ्गहितानि? न केहिचि खन्धेहि न केहिचि आयतनेहि न काहिचि धातूहि असङ्गहितानि।
(चतुक्कं।)
५. इन्द्रियं
५०. चक्खुन्द्रियं कतिहि खन्धेहि कतिहायतनेहि कतिहि धातूहि सङ्गहितं? चक्खुन्द्रियं एकेन खन्धेन एकेनायतनेन एकाय धातुया सङ्गहितं। कतिहि असङ्गहितं? चतूहि खन्धेहि एकादसहायतनेहि सत्तरसहि धातूहि असङ्गहितं।
५१. सोतिन्द्रियं… घानिन्द्रियं… जिव्हिन्द्रियं… कायिन्द्रियं… इत्थिन्द्रियं … पुरिसिन्द्रियं एकेन खन्धेन एकेनायतनेन एकाय धातुया सङ्गहितं। कतिहि असङ्गहितं? चतूहि खन्धेहि एकादसहायतनेहि सत्तरसहि धातूहि असङ्गहितं।
५२. मनिन्द्रियं एकेन खन्धेन एकेनायतनेन सत्तहि धातूहि सङ्गहितं। कतिहि असङ्गहितं? चतूहि खन्धेहि एकादसहायतनेहि एकादसहि धातूहि असङ्गहितं।
५३. जीवितिन्द्रियं द्वीहि खन्धेहि एकेनायतनेन एकाय धातुया सङ्गहितं। कतिहि असङ्गहितं? तीहि खन्धेहि एकादसहायतनेहि सत्तरसहि धातूहि असङ्गहितं।
५४. सुखिन्द्रियं … दुक्खिन्द्रियं… सोमनस्सिन्द्रियं… दोमनस्सिन्द्रियं… उपेक्खिन्द्रियं… सद्धिन्द्रियं… वीरियिन्द्रियं… सतिन्द्रियं… समाधिन्द्रियं… पञ्ञिन्द्रियं… अनञ्ञातञ्ञस्सामीतिन्द्रियं… अञ्ञिन्द्रियं… अञ्ञाताविन्द्रियं एकेन खन्धेन एकेनायतनेन एकाय धातुया सङ्गहितं। कतिहि असङ्गहितं? चतूहि खन्धेहि एकादसहायतनेहि सत्तरसहि धातूहि असङ्गहितं।
(एकमूलकं।)
५५. चक्खुन्द्रियञ्च सोतिन्द्रियञ्च एकेन खन्धेन द्वीहायतनेहि द्वीहि धातूहि सङ्गहिता। कतिहि असङ्गहिता? चतूहि खन्धेहि दसहायतनेहि सोळसहि धातूहि असङ्गहिता।
५६. चक्खुन्द्रियञ्च घानिन्द्रियञ्च… चक्खुन्द्रियञ्च जिव्हिन्द्रियञ्च… चक्खुन्द्रियञ्च कायिन्द्रियञ्च… चक्खुन्द्रियञ्च इत्थिन्द्रियञ्च… चक्खुन्द्रियञ्च पुरिसिन्द्रियञ्च एकेन खन्धेन द्वीहायतनेहि द्वीहि धातूहि सङ्गहिता। कतिहि असङ्गहिता? चतूहि खन्धेहि दसहायतनेहि सोळसहि धातूहि असङ्गहिता।
५७. चक्खुन्द्रियञ्च मनिन्द्रियञ्च द्वीहि खन्धेहि द्वीहायतनेहि अट्ठहि धातूहि सङ्गहिता। कतिहि असङ्गहिता? तीहि खन्धेहि दसहायतनेहि दसहि धातूहि असङ्गहिता।
५८. चक्खुन्द्रियञ्च जीवितिन्द्रियञ्च द्वीहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? तीहि खन्धेहि दसहायतनेहि सोळसहि धातूहि असङ्गहिता।
५९. चक्खुन्द्रियञ्च सुखिन्द्रियञ्च… चक्खुन्द्रियञ्च दुक्खिन्द्रियञ्च… चक्खुन्द्रियञ्च सोमनस्सिन्द्रियञ्च… चक्खुन्द्रियञ्च दोमनस्सिन्द्रियञ्च… चक्खुन्द्रियञ्च उपेक्खिन्द्रियञ्च… चक्खुन्द्रियञ्च सद्धिन्द्रियञ्च… चक्खुन्द्रियञ्च वीरियिन्द्रियञ्च… चक्खुन्द्रियञ्च सतिन्द्रियञ्च… चक्खुन्द्रियञ्च समाधिन्द्रियञ्च… चक्खुन्द्रियञ्च पञ्ञिन्द्रियञ्च… चक्खुन्द्रियञ्च अनञ्ञातञ्ञस्सामीतिन्द्रियञ्च… चक्खुन्द्रियञ्च अञ्ञिन्द्रियञ्च… चक्खुन्द्रियञ्च अञ्ञाताविन्द्रियञ्च द्वीहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? तीहि खन्धेहि दसहायतनेहि सोळसहि धातूहि असङ्गहिता।
(दुकमूलकं।)
६०. बावीसतिन्द्रियानि कतिहि खन्धेहि कतिहायतनेहि कतिहि धातूहि सङ्गहितानि? बावीसतिन्द्रियानि चतूहि खन्धेहि सत्तहायतनेहि तेरसहि धातूहि सङ्गहितानि। कतिहि असङ्गहितानि? एकेन खन्धेन पञ्चहायतनेहि पञ्चहि धातूहि असङ्गहितानि।
६. पटिच्चसमुप्पादादि
६१. अविज्जा एकेन खन्धेन एकेनायतनेन एकाय धातुया सङ्गहिता। कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
६२. अविज्जापच्चया सङ्खारा एकेन खन्धेन एकेनायतनेन एकाय धातुया सङ्गहिता। कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
६३. सङ्खारपच्चया विञ्ञाणं एकेन खन्धेन एकेनायतनेन सत्तहि धातूहि सङ्गहितं। कतिहि असङ्गहितं? चतूहि खन्धेहि एकादसहायतनेहि एकादसहि धातूहि असङ्गहितं।
६४. विञ्ञाणपच्चया नामरूपं चतूहि खन्धेहि एकादसहायतनेहि एकादसहि धातूहि सङ्गहितं। कतिहि असङ्गहितं? एकेन खन्धेन एकेनायतनेन सत्तहि धातूहि असङ्गहितं।
६५. नामरूपपच्चया सळायतनं द्वीहि खन्धेहि छहायतनेहि द्वादसहि धातूहि सङ्गहितं। कतिहि असङ्गहितं? तीहि खन्धेहि छहायतनेहि छहि धातूहि असङ्गहितं।
६६. सळायतनपच्चया फस्सो… फस्सपच्चया वेदना… वेदनापच्चया तण्हा… तण्हापच्चया उपादानं… कम्मभवो [उपादानपच्चया कम्मभवो (सी॰ स्या॰)] एकेन खन्धेन एकेनायतनेन एकाय धातुया सङ्गहितो। कतिहि असङ्गहितो? चतूहि खन्धेहि एकादसहायतनेहि सत्तरसहि धातूहि असङ्गहितो।
६७. उपपत्तिभवो … कामभवो… सञ्ञाभवो… पञ्चवोकारभवो पञ्चहि खन्धेहि एकादसहायतनेहि सत्तरसहि धातूहि सङ्गहितो। कतिहि असङ्गहितो? न केहिचि खन्धेहि एकेनायतनेन एकाय धातुया असङ्गहितो।
६८. रूपभवो पञ्चहि खन्धेहि पञ्चहायतनेहि अट्ठहि धातूहि सङ्गहितो। कतिहि असङ्गहितो? न केहिचि खन्धेहि सत्तहायतनेहि दसहि धातूहि असङ्गहितो।
६९. अरूपभवो… नेवसञ्ञानासञ्ञाभवो… चतुवोकारभवो चतूहि खन्धेहि द्वीहायतनेहि द्वीहि धातूहि सङ्गहितो। कतिहि असङ्गहितो? एकेन खन्धेन दसहायतनेहि सोळसहि धातूहि असङ्गहितो।
७०. असञ्ञाभवो… एकवोकारभवो एकेन खन्धेन द्वीहायतनेहि द्वीहि धातूहि सङ्गहितो। कतिहि असङ्गहितो? चतूहि खन्धेहि दसहायतनेहि सोळसहि धातूहि असङ्गहितो।
७१. जाति द्वीहि खन्धेहि… जरा द्वीहि खन्धेहि… मरणं द्वीहि खन्धेहि एकेनायतनेन एकाय धातुया सङ्गहितं। कतिहि असङ्गहितं? तीहि खन्धेहि एकादसहायतनेहि सत्तरसहि धातूहि असङ्गहितं।
७२. सोको… परिदेवो… दुक्खं… दोमनस्सं… उपायासो… सतिपट्ठानं… सम्मप्पधानं एकेन खन्धेन एकेनायतनेन एकाय धातुया सङ्गहितं। कतिहि असङ्गहितं? चतूहि खन्धेहि एकादसहायतनेहि सत्तरसहि धातूहि असङ्गहितं।
७३. इद्धिपादो द्वीहि खन्धेहि द्वीहायतनेहि द्वीहि धातूहि सङ्गहितो। कतिहि असङ्गहितो? तीहि खन्धेहि दसहायतनेहि सोळसहि धातूहि असङ्गहितो।
७४. झानं द्वीहि खन्धेहि एकेनायतनेन एकाय धातुया सङ्गहितं। कतिहि असङ्गहितं? तीहि खन्धेहि एकादसहायतनेहि सत्तरसहि धातूहि असङ्गहितं।
७५. अप्पमञ्ञा … पञ्चिन्द्रियानि… पञ्च बलानि… सत्त बोज्झङ्गा… अरियो अट्ठङ्गिको मग्गो… फस्सो… वेदना… सञ्ञा… चेतना… अधिमोक्खो… मनसिकारो एकेन खन्धेन एकेनायतनेन एकाय धातुया सङ्गहितो। कतिहि असङ्गहितो? चतूहि खन्धेहि एकादसहायतनेहि सत्तरसहि धातूहि असङ्गहितो।
७६. चित्तं एकेन खन्धेन एकेनायतनेन सत्तहि धातूहि सङ्गहितं। कतिहि असङ्गहितं? चतूहि खन्धेहि एकादसहायतनेहि एकादसहि धातूहि असङ्गहितं।
७. तिकं
७७. कुसला धम्मा… अकुसला धम्मा कतिहि खन्धेहि कतिहायतनेहि कतिहि धातूहि सङ्गहिता? कुसला धम्मा… अकुसला धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
७८. अब्याकता धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
७९. सुखाय वेदनाय सम्पयुत्ता धम्मा… दुक्खाय वेदनाय सम्पयुत्ता धम्मा तीहि खन्धेहि द्वीहायतनेहि तीहि धातूहि सङ्गहिता। कतिहि असङ्गहिता? द्वीहि खन्धेहि दसहायतनेहि पन्नरसहि धातूहि असङ्गहिता।
८०. अदुक्खमसुखाय वेदनाय सम्पयुत्ता धम्मा तीहि खन्धेहि द्वीहायतनेहि सत्तहि धातूहि सङ्गहिता। कतिहि असङ्गहिता? द्वीहि खन्धेहि दसहायतनेहि एकादसहि धातूहि असङ्गहिता।
८१. विपाका धम्मा चतूहि खन्धेहि द्वीहायतनेहि अट्ठहि धातूहि सङ्गहिता। कतिहि असङ्गहिता? एकेन खन्धेन दसहायतनेहि दसहि धातूहि असङ्गहिता।
८२. विपाकधम्मधम्मा… संकिलिट्ठसंकिलेसिका धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
८३. नेवविपाकनविपाकधम्मधम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि तेरसहि धातूहि सङ्गहिता। कतिहि असङ्गहिता ? न केहिचि खन्धेहि न केहिचि आयतनेहि पञ्चहि धातूहि असङ्गहिता।
८४. उपादिन्नुपादानिया धम्मा पञ्चहि खन्धेहि एकादसहायतनेहि सत्तरसहि धातूहि सङ्गहिता। कतिहि असङ्गहिता? न केहिचि खन्धेहि एकेनायतनेन एकाय धातुया असङ्गहिता।
८५. अनुपादिन्नुपादानिया धम्मा पञ्चहि खन्धेहि सत्तहायतनेहि अट्ठहि धातूहि सङ्गहिता। कतिहि असङ्गहिता? न केहिचि खन्धेहि पञ्चहायतनेहि दसहि धातूहि असङ्गहिता।
८६. अनुपादिन्नअनुपादानिया धम्मा… असंकिलिट्ठअसंकिलेसिका धम्मा असङ्खतं खन्धतो ठपेत्वा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
८७. असंकिलिट्ठसंकिलेसिका धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
८८. सवितक्कसविचारा धम्मा चतूहि खन्धेहि द्वीहायतनेहि तीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि पन्नरसहि धातूहि असङ्गहिता।
८९. अवितक्कविचारमत्ता धम्मा… पीतिसहगता धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
९०. अवितक्कअविचारा धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि सत्तरसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि एकाय धातुया असङ्गहिता।
९१. सुखसहगता धम्मा तीहि खन्धेहि द्वीहायतनेहि तीहि धातूहि सङ्गहिता। कतिहि असङ्गहिता? द्वीहि खन्धेहि दसहायतनेहि पन्नरसहि धातूहि असङ्गहिता।
९२. उपेक्खासहगता धम्मा तीहि खन्धेहि द्वीहायतनेहि सत्तहि धातूहि सङ्गहिता। कतिहि असङ्गहिता? द्वीहि खन्धेहि दसहायतनेहि एकादसहि धातूहि असङ्गहिता।
९३. दस्सनेन पहातब्बा धम्मा… भावनाय पहातब्बा धम्मा… दस्सनेन पहातब्बहेतुका धम्मा… भावनाय पहातब्बहेतुका धम्मा… आचयगामिनो धम्मा… अपचयगामिनो धम्मा… सेक्खा धम्मा… असेक्खा धम्मा… महग्गता धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
९४. नेव दस्सनेन न भावनाय पहातब्बा धम्मा… नेव दस्सनेन न भावनाय पहातब्बहेतुका धम्मा… नेवाचयगामिनापचयगामिनो धम्मा… नेवसेक्खनासेक्खा धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
९५. परित्ता धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
९६. अप्पमाणा धम्मा… पणीता धम्मा असङ्खतं खन्धतो ठपेत्वा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
९७. परित्तारम्मणा [परित्तारमणा (?)] धम्मा चतूहि खन्धेहि द्वीहायतनेहि अट्ठहि धातूहि सङ्गहिता। कतिहि असङ्गहिता? एकेन खन्धेन दसहायतनेहि दसहि धातूहि असङ्गहिता।
९८. महग्गतारम्मणा धम्मा… अप्पमाणारम्मणा धम्मा… हीना धम्मा… मिच्छत्तनियता धम्मा… सम्मत्तनियता धम्मा… मग्गारम्मणा धम्मा… मग्गहेतुका धम्मा… मग्गाधिपतिनो धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
९९. मज्झिमा धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१००. अनियता धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१०१. उप्पन्ना धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१०२. अनुप्पन्ना धम्मा पञ्चहि खन्धेहि सत्तहायतनेहि अट्ठहि धातूहि सङ्गहिता। कतिहि असङ्गहिता? न केहिचि खन्धेहि पञ्चहायतनेहि दसहि धातूहि असङ्गहिता।
१०३. उप्पादिनो धम्मा पञ्चहि खन्धेहि एकादसहायतनेहि सत्तरसहि धातूहि सङ्गहिता। कतिहि असङ्गहिता? न केहिचि खन्धेहि एकेनायतनेन एकाय धातुया असङ्गहिता।
१०४. अतीता धम्मा… अनागता धम्मा… पच्चुप्पन्ना धम्मा… अज्झत्ता धम्मा… अज्झत्तबहिद्धा धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१०५. बहिद्धा धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१०६. अतीतारम्मणा धम्मा… अनागतारम्मणा धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१०७. पच्चुप्पन्नारम्मणा धम्मा… अज्झत्तारम्मणा धम्मा… बहिद्धारम्मणा धम्मा… अज्झत्तबहिद्धारम्मणा धम्मा चतूहि खन्धेहि द्वीहायतनेहि अट्ठहि धातूहि सङ्गहिता। कतिहि असङ्गहिता? एकेन खन्धेन दसहायतनेहि दसहि धातूहि असङ्गहिता।
१०८. सनिदस्सनसप्पटिघा धम्मा एकेन खन्धेन एकेनायतनेन एकाय धातुया सङ्गहिता । कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
१०९. अनिदस्सनसप्पटिघा धम्मा एकेन खन्धेन नवहायतनेहि नवहि धातूहि सङ्गहिता। कतिहि असङ्गहिता? चतूहि खन्धेहि तीहायतनेहि नवहि धातूहि असङ्गहिता।
११०. अनिदस्सनअप्पटिघा धम्मा असङ्खतं खन्धतो ठपेत्वा पञ्चहि खन्धेहि द्वीहायतनेहि अट्ठहि धातूहि सङ्गहिता। कतिहि असङ्गहिता? न केहिचि खन्धेहि, दसहायतनेहि दसहि धातूहि असङ्गहिता।
८. दुकं
१११. हेतू धम्मा… हेतू चेव सहेतुका च धम्मा… हेतू चेव हेतुसम्पयुत्ता च धम्मा एकेन खन्धेन एकेनायतनेन एकाय धातुया सङ्गहिता। कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
११२. न हेतू धम्मा… अहेतुका धम्मा… हेतुविप्पयुत्ता धम्मा… न हेतू अहेतुका [न हेतू अहेतुका (स्या॰ क॰) विभ॰ दुकपञ्हापुच्छकेपि] धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
११३. सहेतुका धम्मा… हेतुसम्पयुत्ता धम्मा… सहेतुका चेव न च हेतू धम्मा… हेतुसम्पयुत्ता चेव न च हेतू धम्मा… न हेतू सहेतुका धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
११४. सप्पच्चया धम्मा… सङ्खता धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
११५. अप्पच्चया धम्मा… असङ्खता धम्मा न केहिचि खन्धेहि एकेनायतनेन एकाय धातुया सङ्गहिता। कतिहि असङ्गहिता? पञ्चहि खन्धेहि एकादसहायतनेहि सत्तरसहि धातूहि असङ्गहिता।
११६. सनिदस्सना धम्मा एकेन खन्धेन एकेनायतनेन एकाय धातुया सङ्गहिता। कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
११७. अनिदस्सना धम्मा असङ्खतं खन्धतो ठपेत्वा पञ्चहि खन्धेहि एकादसहायतनेहि सत्तरसहि धातूहि सङ्गहिता। कतिहि असङ्गहिता? न केहिचि खन्धेहि, एकेनायतनेन एकाय धातुया असङ्गहिता।
११८. सप्पटिघा धम्मा एकेन खन्धेन दसहायतनेहि दसहि धातूहि सङ्गहिता। कतिहि असङ्गहिता? चतूहि खन्धेहि द्वीहायतनेहि अट्ठहि धातूहि असङ्गहिता।
११९. अप्पटिघा धम्मा असङ्खतं खन्धतो ठपेत्वा पञ्चहि खन्धेहि द्वीहायतनेहि अट्ठहि धातूहि सङ्गहिता। कतिहि असङ्गहिता? न केहिचि खन्धेहि, दसहायतनेहि दसहि धातूहि असङ्गहिता।
१२०. रूपिनो धम्मा एकेन खन्धेन एकादसहायतनेहि एकादसहि धातूहि सङ्गहिता। कतिहि असङ्गहिता? चतूहि खन्धेहि एकेनायतनेन सत्तहि धातूहि असङ्गहिता।
१२१. अरूपिनो धम्मा असङ्खतं खन्धतो ठपेत्वा चतूहि खन्धेहि द्वीहायतनेहि अट्ठहि धातूहि सङ्गहिता। कतिहि असङ्गहिता? एकेन खन्धेन दसहायतनेहि दसहि धातूहि असङ्गहिता।
१२२. लोकिया धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१२३. लोकुत्तरा धम्मा असङ्खतं खन्धतो ठपेत्वा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१२४. केनचि विञ्ञेय्या धम्मा… केनचि न विञ्ञेय्या धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१२५. आसवा धम्मा… आसवा चेव सासवा च धम्मा… आसवा चेव आसवसम्पयुत्ता च धम्मा एकेन खन्धेन एकेनायतनेन एकाय धातुया सङ्गहिता। कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
१२६. नो आसवा धम्मा… आसवविप्पयुत्ता धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१२७. सासवा धम्मा… सासवा चेव नो च आसवा धम्मा… आसवविप्पयुत्ता सासवा धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१२८. अनासवा धम्मा… आसवविप्पयुत्ता अनासवा धम्मा असङ्खतं खन्धतो ठपेत्वा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१२९. आसवसम्पयुत्ता धम्मा… आसवसम्पयुत्ता चेव नो च आसवा धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१३०. संयोजना धम्मा… गन्था धम्मा… ओघा धम्मा… योगा धम्मा… नीवरणा धम्मा… परामासा धम्मा… परामासा चेव परामट्ठा च धम्मा एकेन खन्धेन एकेनायतनेन एकाय धातुया सङ्गहिता। कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
१३१. नो परामासा धम्मा… परामासविप्पयुत्ता धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता । कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१३२. परामट्ठा धम्मा… परामट्ठा चेव नो च परामासा धम्मा… परामासविप्पयुत्ता परामट्ठा धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१३३. अपरामट्ठा धम्मा… परामासविप्पयुत्ता अपरामट्ठा धम्मा असङ्खतं खन्धतो ठपेत्वा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१३४. परामाससम्पयुत्ता धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१३५. सारम्मणा धम्मा चतूहि खन्धेहि द्वीहायतनेहि अट्ठहि धातूहि सङ्गहिता। कतिहि असङ्गहिता? एकेन खन्धेन दसहायतनेहि दसहि धातूहि असङ्गहिता।
१३६. अनारम्मणा धम्मा असङ्खतं खन्धतो ठपेत्वा एकेन खन्धेन एकादसहायतनेहि एकादसहि धातूहि सङ्गहिता। कतिहि असङ्गहिता? चतूहि खन्धेहि एकेनायतनेन सत्तहि धातूहि असङ्गहिता।
१३७. चित्ता धम्मा एकेन खन्धेन एकेनायतनेन सत्तहि धातूहि सङ्गहिता। कतिहि असङ्गहिता? चतूहि खन्धेहि एकादसहायतनेहि एकादसहि धातूहि असङ्गहिता।
१३८. नो चित्ता धम्मा असङ्खतं खन्धतो ठपेत्वा चतूहि खन्धेहि एकादसहायतनेहि एकादसहि धातूहि सङ्गहिता। कतिहि असङ्गहिता? एकेन खन्धेन एकेनायतनेन सत्तहि धातूहि असङ्गहिता।
१३९. चेतसिका धम्मा… चित्तसम्पयुत्ता धम्मा… चित्तसंसट्ठा धम्मा तीहि खन्धेहि एकेनायतनेन एकाय धातुया सङ्गहिता। कतिहि असङ्गहिता? द्वीहि खन्धेहि एकादसहायतनेहि सत्तरसहि धातूहि असङ्गहिता।
१४०. अचेतसिका धम्मा असङ्खतं खन्धतो ठपेत्वा द्वीहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? तीहि खन्धेहि न केहिचि आयतनेहि न काहिचि धातूहि असङ्गहिता।
१४१. चित्तविप्पयुत्ता धम्मा… चित्तविसंसट्ठा धम्मा असङ्खतं खन्धतो ठपेत्वा एकेन खन्धेन एकादसहायतनेहि एकादसहि धातूहि सङ्गहिता। कतिहि असङ्गहिता? चतूहि खन्धेहि एकेनायतनेन सत्तहि धातूहि असङ्गहिता।
१४२. चित्तसमुट्ठाना धम्मा चतूहि खन्धेहि छहायतनेहि छहि धातूहि सङ्गहिता। कतिहि असङ्गहिता? एकेन खन्धेन छहायतनेहि द्वादसहि धातूहि असङ्गहिता।
१४३. नो चित्तसमुट्ठाना धम्मा… नो चित्तसहभुनो धम्मा… नो चित्तानुपरिवत्तिनो धम्मा असङ्खतं खन्धतो ठपेत्वा द्वीहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? तीहि खन्धेहि न केहिचि आयतनेहि न काहिचि धातूहि असङ्गहिता।
१४४. चित्तसहभुनो धम्मा… चित्तानुपरिवत्तिनो धम्मा चतूहि खन्धेहि एकेनायतनेन एकाय धातुया सङ्गहिता। कतिहि असङ्गहिता? एकेन खन्धेन एकादसहायतनेहि सत्तरसहि धातूहि असङ्गहिता।
१४५. चित्तसंसट्ठसमुट्ठाना धम्मा… चित्तसंसट्ठसमुट्ठानसहभुनो धम्मा… चित्तसंसट्ठसमुट्ठानानुपरिवत्तिनो धम्मा तीहि खन्धेहि एकेनायतनेन एकाय धातुया सङ्गहिता। कतिहि असङ्गहिता? द्वीहि खन्धेहि एकादसहायतनेहि सत्तरसहि धातूहि असङ्गहिता।
१४६. नो चित्तसंसट्ठसमुट्ठाना धम्मा… नो चित्तसंसट्ठसमुट्ठानसहभुनो धम्मा… नो चित्तसंसट्ठसमुट्ठानानुपरिवत्तिनो धम्मा असङ्खतं खन्धतो ठपेत्वा द्वीहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? तीहि खन्धेहि न केहिचि आयतनेहि न काहिचि धातूहि असङ्गहिता।
१४७. अज्झत्तिका धम्मा द्वीहि खन्धेहि छहायतनेहि द्वादसहि धातूहि सङ्गहिता। कतिहि असङ्गहिता? तीहि खन्धेहि छहायतनेहि छहि धातूहि असङ्गहिता।
१४८. बाहिरा धम्मा असङ्खतं खन्धतो ठपेत्वा चतूहि खन्धेहि छहायतनेहि छहि धातूहि सङ्गहिता। कतिहि असङ्गहिता? एकेन खन्धेन छहायतनेहि द्वादसहि धातूहि असङ्गहिता।
१४९. उपादा धम्मा एकेन खन्धेन दसहायतनेहि दसहि धातूहि सङ्गहिता। कतिहि असङ्गहिता? चतूहि खन्धेहि द्वीहायतनेहि अट्ठहि धातूहि असङ्गहिता।
१५०. नो उपादा धम्मा असङ्खतं खन्धतो ठपेत्वा पञ्चहि खन्धेहि तीहायतनेहि नवहि धातूहि सङ्गहिता। कतिहि असङ्गहिता? न केहिचि खन्धेहि नवहायतनेहि नवहि धातूहि असङ्गहिता।
१५१. उपादिन्ना धम्मा पञ्चहि खन्धेहि एकादसहायतनेहि सत्तरसहि धातूहि सङ्गहिता । कतिहि असङ्गहिता? न केहिचि खन्धेहि एकेनायतनेन एकाय धातुया असङ्गहिता।
१५२. अनुपादिन्ना धम्मा असङ्खतं खन्धतो ठपेत्वा पञ्चहि खन्धेहि सत्तहायतनेहि अट्ठहि धातूहि सङ्गहिता। कतिहि असङ्गहिता? न केहिचि खन्धेहि पञ्चहायतनेहि दसहि धातूहि असङ्गहिता।
१५३. उपादाना धम्मा… किलेसा धम्मा… किलेसा चेव संकिलेसिका च धम्मा… किलेसा चेव संकिलिट्ठा च धम्मा… किलेसा चेव किलेससम्पयुत्ता च धम्मा एकेन खन्धेन एकेनायतनेन एकाय धातुया सङ्गहिता। कतिहि असङ्गहिता? चतूहि खन्धेहि एकादसहायतनेहि सत्तरसहि धातूहि असङ्गहिता।
१५४. नो किलेसा धम्मा… असंकिलिट्ठा धम्मा… किलेसविप्पयुत्ता धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१५५. संकिलेसिका धम्मा… संकिलेसिका चेव नो च किलेसा धम्मा… किलेसविप्पयुत्ता संकिलेसिका धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१५६. असंकिलेसिका धम्मा… किलेसविप्पयुत्ता असंकिलेसिका धम्मा असङ्खतं खन्धतो ठपेत्वा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१५७. संकिलिट्ठा धम्मा… किलेससम्पयुत्ता धम्मा… संकिलिट्ठा चेव नो च किलेसा धम्मा… किलेससम्पयुत्ता चेव नो च किलेसा धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१५८. दस्सनेन पहातब्बा धम्मा… भावनाय पहातब्बा धम्मा… दस्सनेन पहातब्बहेतुका धम्मा… भावनाय पहातब्बहेतुका धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१५९. न दस्सनेन पहातब्बा धम्मा… न भावनाय पहातब्बा धम्मा … न दस्सनेन पहातब्बहेतुका धम्मा… न भावनाय पहातब्बहेतुका धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१६०. सवितक्का धम्मा… सविचारा धम्मा चतूहि खन्धेहि द्वीहायतनेहि तीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि पन्नरसहि धातूहि असङ्गहिता।
१६१. अवितक्का धम्मा… अविचारा धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि सत्तरसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि एकाय धातुया असङ्गहिता।
१६२. सप्पीतिका धम्मा… पीतिसहगता धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१६३. अप्पीतिका धम्मा… न पीतिसहगता धम्मा… न सुखसहगता धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१६४. सुखसहगता धम्मा तीहि खन्धेहि द्वीहायतनेहि तीहि धातूहि सङ्गहिता। कतिहि असङ्गहिता? द्वीहि खन्धेहि दसहायतनेहि पन्नरसहि धातूहि असङ्गहिता।
१६५. उपेक्खासहगता धम्मा तीहि खन्धेहि द्वीहायतनेहि सत्तहि धातूहि सङ्गहिता। कतिहि असङ्गहिता? द्वीहि खन्धेहि दसहायतनेहि एकादसहि धातूहि असङ्गहिता।
१६६. न उपेक्खासहगता धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि तेरसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि पञ्चहि धातूहि असङ्गहिता।
१६७. कामावचरा धम्मा… परियापन्ना धम्मा… सउत्तरा धम्मा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
१६८. न कामावचरा धम्मा… अपरियापन्ना धम्मा… अनुत्तरा धम्मा असङ्खतं खन्धतो ठपेत्वा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१६९. रूपावचरा धम्मा… अरूपावचरा धम्मा… निय्यानिका धम्मा… नियता धम्मा… सरणा धम्मा चतूहि खन्धेहि द्वीहायतनेहि द्वीहि धातूहि सङ्गहिता। कतिहि असङ्गहिता? एकेन खन्धेन दसहायतनेहि सोळसहि धातूहि असङ्गहिता।
१७०. न रूपावचरा धम्मा… न अरूपावचरा धम्मा… अनिय्यानिका धम्मा… अनियता धम्मा… अरणा धम्मा कतिहि खन्धेहि कतिहायतनेहि कतिहि धातूहि सङ्गहिता? अरणा धम्मा असङ्खतं खन्धतो ठपेत्वा पञ्चहि खन्धेहि द्वादसहायतनेहि अट्ठारसहि धातूहि सङ्गहिता। कतिहि असङ्गहिता? न केहिचि खन्धेहि न केहिचि आयतनेहि न काहिचि धातूहि असङ्गहिता।
सङ्गहासङ्गहपदनिद्देसो पठमो।